Bank Employee News : बँक कर्मचाकी संघटनांनी तीन दिवसांच्या संपाचा इशारा दिला होता. सोमवारपासून संप करण्याची भूमिका घेतली होती. मात्र, रविवारी झालेल्या संघटनांच्या बैठकीत संप करणार नसल्याचे जाहीर केले. त्यामुळं आता बँक कर्मचाऱ्यांच्या मागणीवर तोडगा निघण्याची शक्यता निर्माण झाली आहे. पाच दिवसांचा आठवडा करावा ही बँक कर्मचाऱ्यांची प्रमुख मागणी आहे. ही मागणी मान्य होण्याच्या दिशेने पहिलं पाऊल पडलं आहे. कारण, एक उच्चस्तरीय समिती स्थापन केली आहे. या समितीत बँक व्यवस्थापन आणि बँक कर्मचारी संघटना या दोन्हींचे प्रतिनिधी असणार आहेत.
समितीत बँक व्यवस्थापन आणि बँक कर्मचारी संघटना या दोन्हींचे प्रतिनिधी
रविवारी रात्री उशिरा झालेल्या आयबीए (IBA) आणि यूएफबीयू (UFBU) यांच्या बैठकीनंतर बँकांचा संप स्थगित करण्यात आला. पाच दिवसांच्या कामाच्या आठवड्याच्या मागणीसह अनेक मुद्द्यांवरून बँक कर्मचारी तीन दिवसांच्या संपाची योजना आखत होते. आता, बँकांमध्ये पाच दिवसांचा कामाचा आठवडा आणि शनिवार व रविवारच्या सुट्ट्या लागू करण्याच्या दिशेने आणखी एक पाऊल उचलण्यात आले आहे. इंडियन बँक्स असोसिएशनने (IBA) हा प्रस्ताव कसा लागू करायचा यावर चर्चा करण्यासाठी एक उच्चस्तरीय समिती स्थापन केली आहे. या समितीत बँक व्यवस्थापन आणि बँक कर्मचारी संघटना या दोन्हींचे प्रतिनिधी असतील.
समितीचे अध्यक्षपद बँक ऑफ इंडियाचे एमडी आणि सीईओ रजनीश कर्नाटक भूषवतील
27 सप्टेंबर रोजी रात्री उशिरा आयबीए (IBA) आणि युनायटेड फोरम ऑफ बँक युनियन्स (UFBU) यांच्यात झालेल्या बैठकीनंतर हा निर्णय घेण्यात आला. या समितीचे अध्यक्षपद बँक ऑफ इंडियाचे एमडी आणि सीईओ रजनीश कर्नाटक भूषवतील. पंजाब नॅशनल बँकेचे एमडी आणि सीईओ अशोक चंद्र यांची पर्यायी अध्यक्ष म्हणून नियुक्ती करण्यात आली आहे. या समितीत इंडियन बँकेचे एमडी आणि सीईओ विनोद कुमार, बँक ऑफ इंडियाचे एमडी आणि सीईओ राकेश शर्मा आणि एसबीआयचे मुख्य महाव्यवस्थापक (एचआर आणि सीडीओ) जी. एस. राणा यांचा समावेश आहे. बँक कर्मचारी संघटनांच्या वतीने, एआयबीईए (AIBEA), एआयबीओसी (AIBOC), एनसीबीई (NCBE), एआयबीओए (AIBOA), बीईएफआय (BEFI), आयएनबीओसी (INBOC) आणि आयएनबीईएफ (INBEF) यांचे महासचिव या समितीत सामील होतील. बीकेएसएमचे (BKSM) महासचिव विनोद निकम यांची विशेष निमंत्रित म्हणून नियुक्ती करण्यात आली आहे.
सध्या कामकाज कसे चालते?
बँकांमध्ये पाच दिवसांच्या कामकाजाच्या दिवसाची मागणी अनेक वर्षांपासून सुरू आहे. जर हा प्रस्ताव लागू झाला, तर बँका सर्व शनिवारी बंद राहतील. सध्या, महिन्याच्या दुसऱ्या आणि चौथ्या शनिवारी बँका बंद असतात, तर उर्वरित शनिवारी कामकाज नेहमीप्रमाणे सुरू असते.
वेळ वाढवली जाईल
या व्यवस्थेची अंमलबजावणी करण्यासाठी, दैनंदिन बँकिंग कामकाजाचे तास वाढवण्याचा प्रस्तावही मांडण्यात आला होता. 31 जानेवारी 2023 रोजी, आयबीएने दैनंदिन कामकाजाच्या तासांमध्ये 45 मिनिटांची वाढ करण्याचा प्रस्ताव दिला. कर्मचारी संघटनांनी यापूर्वी 30 मिनिटांच्या वाढीची सूचना केली होती. आयबीए आणि यूएफबीयू यांच्यातील डिसेंबर 2023 च्या करारानुसार, सर्व शनिवार सुट्टी म्हणून घोषित करावेत अशी शिफारस सरकारला करण्यास आणि लवकर मंजुरीसाठी या प्रकरणाचा पाठपुरावा करण्यास आयबीएने सहमती दर्शवली.
Bank protest : बँक कर्मचाऱ्यांचा आजपासून सुरु होणारा तीन दिवसांचा संप मागे
