dil hum hum kare song storyImage Credit source: टीव्ही ९ मराठी
बॉलिवूडमधील अनेक गाणी वेगवेगळ्या प्रादेशिक संगीत परंपरांशी जोडलेली आहेत. यांपैकी काही जुनी गाणी आजही लोकांच्या मनात घर करून आहेत. लोकसंगीताची झलक असलेली ही गाणी नेहमीच प्रेक्षकांच्या पसंतीस उतरतात. हिंदी सिनेमातही अशी अनेक गाणी तयार झाली आहेत, ज्यांच्या सुरांमधून लोकसंगीताची खास ओळख जाणवते. याच यादीतील एक सदाबाहार गाणं म्हणजे ‘दिल हूम-हूम करे’.
हे गाणे आजपासून 33 वर्षांपूर्वी प्रदर्शित झालेल्या ‘रुदाली’ चित्रपटातील आहे. 1993 मध्ये डिंपल कपाडिया यांचा ‘रुदाली’ हा चित्रपट प्रदर्शित झाला. या चित्रपटातील ‘दिल हूम-हूम करे’ हे गाणे लता मंगेशकर यांनी आपल्या सुरेल आवाजात गायले आहे. या गाण्याचे बोल गुलजार यांनी लिहिले आहेत. गाण्यातील प्रत्येक शब्द मनातील तडफड आणि भावना व्यक्त करतो. लोक हे गाणं स्तब्ध होऊन ऐकायचे. या गाण्यातील भाव काळजाला भिडणारा आहे.
या गाण्याच्या संगीतामध्ये आसामच्या पारंपरिक आसमच्या बिहू संगीताची प्रेरणा असल्याचे सांगितले जाते. या गाण्याचे संगीत डॉ. भूपेन हजारिका यांनी दिले आहे. गाण्याच्या मेल व्हॉइसमध्ये डॉ. भूपेन हजारिका यांचा आवाज ऐकायला मिळतो. IMDb मध्ये दिलेल्या माहितीनुसार, आसामच्या संगीत क्षेत्रातील प्रसिद्ध गायक आणि संगीतकार डॉ. भूपेन हजारिका यांनी ‘बुकु हूम-हूम कोरे’ हे प्रसिद्ध आसामी गाणे गायले होते. ‘दिल हूम-हूम करे’ हे हिंदी गाणे याच गाण्यापासून प्रेरित असल्याचे सांगितले जाते. हिंदी गाण्यातही हजारिका यांनी आपला आवाज दिला आहे.
‘रुदाली’ चित्रपटाचे दिग्दर्शन कल्पना लाजमी यांनी केले होते. चित्रपटात डिंपल कपाडिया, राज बब्बर, राखी आणि अमजद खान यांनी प्रमुख भूमिका साकारल्या. चित्रपटाची कथा शनिचारी या डिंपल कपाडिया यांनी साकारलेल्या व्यक्तिरेखेभोवती फिरते. राजस्थानमधील एका छोट्या गावात राहणाऱ्या महिलेचा संघर्ष या कथेतून मांडण्यात आला आहे.
या गाण्याची लोकप्रियता आजही कायम असल्याचे दिसून येते. लता मंगेशकर यांच्या आवाजातील भावपूर्ण सादरीकरण आणि डॉ. हजारिका यांच्या संगीताची वेगळी शैली यामुळे या गाण्याला विशेष ओळख मिळाली. प्रादेशिक लोकसंगीत आणि हिंदी चित्रपटसंगीत यांचा सुंदर मेळ या गाण्यात ऐकायला मिळतो. त्यामुळे ‘दिल हूम-हूम करे’ हे गाणे केवळ चित्रपटातील गाणे न राहता लोकसंगीताच्या प्रभावाचे एक लक्षात राहणारे उदाहरण ठरले आहे आणि संगीतप्रेमींच्या मनात आजही आहे.
