धाराशिवच्या राजकारणात सध्या मोठ्या राजकीय घडामोडी घडताना दिसत आहेत. शिवसेना उद्धव बाळासाहेब ठाकरे पक्षातील 5 नगरसेवक भाजपमध्ये प्रवेश करण्यासाठी मुंबईच्या दिशेने निघाले होते, मात्र हे नगरसेवक पुण्यातूनच माघारी फिरले होते. आता हेच पाच नगरसेवक शिवसेनेत प्रवेश करणार असल्याची माहिती सूत्रांकडून समोर आली आहे. या पाचही नगरसेवकांचा मुंबईत उपमुख्यमंत्री एकनाथ शिंदे यांच्या मार्गदर्शनाखाली शिवसेनेत प्रवेश होण्याची शक्यता आहे. भाजपमध्ये प्रवेश करण्यासाठी निघालेल्या नगरसेवकांनी पुण्यातूनच माघार घेतल्यानंतर धाराशिवच्या राजकीय वर्तुळात चर्चांना उधाण आले होते. मात्र आता हे नगरसेवक एकनाथ शिंदे यांच्या शिवसेनेत प्रवेश करण्याची शक्यता आहे.
पुण्यातच घडला राजकीय ट्विस्ट
भाजपमध्ये प्रवेश करण्यासाठी मुंबईच्या दिशेने निघालेल्या या नगरसेवकांची पुण्यातच शिवसेनेच्या नेत्यांनी भेट घेऊन समजूत काढल्याची माहिती समोर आली आहे. त्यानंतर नगरसेवकांनी भाजपमध्ये प्रवेश न करण्याचा निर्णय घेतल्याचे समजते. मात्र आता त्यांचा एकनाथ शिंदे यांच्या शिवसेनेत प्रवेश होणार असल्याची माहिती सूत्रांकडून मिळत आहे. या संभाव्य पक्षप्रवेशामुळे धाराशिव जिल्ह्यात भाजप आणि शिंदेसेनेमधील अंतर्गत राजकीय समीकरणांवरही परिणाम होण्याची शक्यता व्यक्त केली जात आहे.
कळंबनंतर धाराशिव शहराकडे लक्ष
काही दिवसांपूर्वी कळंबमध्ये ठाकरे गटातील नगरसेवकांनी भाजपमध्ये प्रवेश केला होता. त्यानंतर धाराशिव शहरातील या पाच नगरसेवकांच्या भूमिकेकडे राजकीय वर्तुळाचे लक्ष लागले होते. हे नगरसेवक भाजपमध्ये प्रवेश करणार असल्याची चर्चा सुरू असतानाच पुण्यातून त्यांना माघारी फिरावे लागले. आता हे पाच नगरसेवक भाजपऐवजी एकनाथ शिंदे यांच्या शिवसेनेत प्रवेश करण्याच्या तयारीत असल्याची माहिती समोर आल्याने धाराशिवच्या राजकारणात नव्या चर्चेला सुरुवात झाली आहे.
या पाच नगरसेवकांच्या संभाव्य पक्षप्रवेशानंतर धाराशिव शहरातील राजकीय समीकरणे नेमकी कशी बदलतात, तसेच भाजप आणि शिवसेनेतील स्थानिक संबंधांवर त्याचा काय परिणाम होतो, याकडे सर्वांचे लक्ष लागले आहे. कारण या पक्षप्रवेशामुळे शिवसेना ठाकरे गटाला मोठा धक्का बसण्याची शक्यता आहे.
