Health: कॅन्सर झाला म्हणजे करिअर संपले का? नव्याने करिअरची सुरुवात कशी कराल? डॉक्टर सांगतात…

Health: कॅन्सरचे निदान झाल्यानंतर रुग्णाला केवळ आजाराचीच चिंता नसते, तर त्याच्या उपचारांचा नोकरीवर आणि करिअरवर काय परिणाम होईल, याचीही भीती असते. “उपचारांमुळे माझे काम थांबेल का?”, “करिअरमध्ये ब्रेक पडला तर पुढे काय?”, “पुन्हा पूर्वीसारखे काम करता येईल का?” असे प्रश्न मनात येतात. मात्र कॅन्सरचे निदान झाले म्हणजे करिअरला पूर्णविराम मिळाल असे नाही. योग्य उपचार, नियोजन आणि आवश्यक सहकार्याच्या मदतीने अनेक रुग्ण उपचारांसोबतच आपल्या व्यावसायिक आयुष्याचीही वाटचाल सुरू ठेवू शकतात. याबाबत विविध तज्ज्ञांनी काय मार्गदर्शन केलंय? जाणून घेऊया…

कॅन्सर झाल्यानंतर नव्याने करिअरची सुरुवात कशी कराल?

कॅन्सरच्या उपचारांमध्ये केमोथेरपी, रेडिएशन किंवा शस्त्रक्रियेनंतर येणारा थकवा, अशक्तपणा, मळमळणे, झोपेच्या समस्या आणि भावनिक ताण यांसारख्या अडचणी येऊ शकतात. मात्र सर्व रुग्णांना पूर्णपणे काम थांबवण्याची आवश्यकता असतेच असे नाही. अनेक जण वर्क फ्रॉम होम, स्वतःच्या सोयीनुसार कामाचे तास किंवा कमी कामाचा ताण असलेल्या जबाबदाऱ्या स्वीकारून आपले करिअर सुरू ठेवतात.

कर्करोग तज्ज्ञांनी दिलेल्या माहितीनुसार उपचारादरम्यान काम सुरू ठेवल्याने आर्थिक बाबतीत सुरक्षितता तर मिळतेच शिवाय दैनंदिन दिनचर्या कायम राहिल्याने मानसिक आरोग्यावरही त्याचा सकारात्मक परिणाम होतो. कामामुळे रुग्णांमध्ये आत्मविश्वास वाढण्यास आणि आजारापासून लक्ष दुसरीकडे वळण्यास मदत होते.

शरीराच्या क्षमतेपेक्षा अधिक काम करण्याचा प्रयत्न टाळणे आवश्यक आहे. पुरेशी विश्रांती, संतुलित आहार, नियमित फॉलो-अप आणि कार्यालयीन सहकाऱ्यांचा आधार उपचारादरम्यान तितकाच महत्त्वाचा ठरतो.

डॉ. सिद्धेश त्र्यंबके (क्लिनिकल आणि रेडिएशन ऑन्कोलॉजिस्ट,टीजीएच ऑन्को लाईफ कॅन्सर सेंटर, तळेगाव) म्हणाले, कॅन्सरचे निदान म्हणजे करिअरचा शेवट नव्हे. आजच्या आधुनिक उपचार पद्धतींमुळे अनेक रुग्ण उपचार घेत असतानाही आपले व्यावसायिक आयुष्य सुरू ठेवू शकतात. प्रत्येक रुग्णाची शारीरिक क्षमता आणि उपचारांचा प्रकार वेगळा असतो, त्यामुळे आपल्या कामाचे स्वरूप त्यानुसार ठरवणे गरजेचे आहे. कुटुंबीय आणि वैद्यकीय टीम यांचे सहकार्य मिळाल्यास रुग्ण उपचार आणि नोकरी यामध्ये योग्य समतोल साधू शकतात. एक लक्षात असू द्या ती प्रत्येक रुग्णाची उपचारपद्धती आणि शारीरिक क्षमता वेगळी असते. काहींना उपचारांदरम्यान कामापासून ब्रेक घ्यावा लागू शकतो, तर काही जण कामाचे तास किंवा स्वरूप बदलून काम सुरू ठेवू शकतात. बऱ्याचदा रोजच्या कामाशी जोडलेले राहणे हे त्या रुग्णांच्या मानसिक आरोग्यासाठीही फायदेशीर ठरते आणि त्यांना सामान्य जीवन जगण्याचा आत्मविश्वास देते.

डॉ. ललित बन्सवाल(ऑन्को सर्जन, अपोलो स्पेक्ट्रा हॉस्पिटल, पुणे) सांगतात की, कर्करोगाचे निदान झाले म्हणजे करिअर संपले असे नाही. योग्य वैद्यकीय उपचार, कुटुंबीय आणि सहकाऱ्यांचा आधार तसेच कामाच्या ठिकाणी योग्य वातावरण मिळाल्यास अनेक रुग्ण उपचारानंतर पुन्हा कामावर रुजू होऊ शकतात आणि आपले करिअर पुढे सुरू ठेवू शकतात.

कामाच्या ठिकाणी विविध धोरणे अंमलात आणली गेली पाहिजेत – डॉक्टर..

डॉक्टर सांगतात, कामाच्या ठिकाणी कर्करोगाबाबत जनजागृती करणे आणि उपचार घेत असलेल्या कर्मचाऱ्यांना विशेष आधार देणारी धोरणे अंमलात आणली गेली पाहिजेत. त्यामुळे रुग्णांना त्यांची नोकरी सुरू ठेवण्यास आणि जीवनाचा दर्जा चांगला राखण्यास मदत होते. मात्र, उपचार आणि आरोग्याला प्रथम प्राधान्य देणे गरजेचे आहे. डॉक्टरांच्या सल्ल्यानुसार प्रकृती सुधारत गेल्यावर हळूहळू काम सुरू करावे. कर्करोगामुळे आयुष्याची दिशा काही प्रमाणात बदलू शकते, मात्र त्याचा अर्थ करिअरचा शेवट झाला असा अजिबात नाही. आपल्या आरोग्याच्या गरजा समजून घेऊन आवश्यक मदत स्वीकारावी आणि त्यानुसार पुढील वाटचालीचे नियोजन करावे.

हेही वाचा :