आधार कार्डचा जुना मोबाईल नंबर कसा बदलायचा? ऑनलाईन प्रोसेस अगदी सोपी

सोशल मीडियावर 2 मिनिटांत घरबसल्या आधारचा मोबाईल नंबर बदला, असे अनेक व्हिडिओ पाहायला मिळतात. परंतु, भारतीय विशिष्ट ओळख प्राधिकरण (UIDAI) च्या सुरक्षा नियमांनुसार, सुरक्षेच्या कारणास्तव आधारमधील मोबाईल नंबर पूर्णपणे ऑनलाइन घरातून बदलता येत नाही. यासाठी तुमचे बायोमेट्रिक व्हेरिफिकेशन अनिवार्य असते. मात्र, तुम्ही ऑनलाइन पद्धतीचा वापर करून तुमचा वेळ नक्कीच वाचवू शकता.

नंबर बदलण्यासाठी सध्या देशात दोनच सर्वात सोपे आणि कायदेशीर मार्ग उपलब्ध आहेत.

ऑनलाइन अपॉइंटमेंट बुक करून आधार केंद्रावर जाणे

आधार केंद्रावरील लांबच लांब रांगा टाळण्यासाठी तुम्ही आधीच ऑनलाइन वेळ (Slot) बुक करू शकता. यासाठी खालील पायऱ्या फॉलो करा:

ऑनलाईन कसा अपडेट करावा?

• सर्वप्रथम UIDAI च्या अधिकृत वेबसाईटला (uidai.gov.in) भेट द्या.
• ‘My Aadhaar’ या पर्यायावर जाऊन ‘Book an Appointment’ वर क्लिक करा.
• तुमचे शहर किंवा जवळचा परिसर निवडा आणि ‘Proceed to Book Appointment’ वर क्लिक करा.
• तुमचा चालू मोबाईल नंबर आणि कॅप्चा कोड टाकून OTP जनरेट करा.
• लॉगिन झाल्यानंतर ‘Aadhaar Update’ चा पर्याय निवडा आणि तुमचा नवीन मोबाईल नंबर अचूक भरा.
• तुम्हाला सोयीची वाटणारी तारीख आणि वेळ निवडून 50 रुपये अधिकृत फी ऑनलाईन किंवा केंद्रावर भरण्याचा पर्याय निवडा.

तुम्हाला मिळालेली अपॉइंटमेंट स्लिप घेऊन ठराविक वेळेत जवळच्या आधार सेवा केंद्रावर जा. तिथे तुमचे बायोमेट्रिक्स घेतले जातील आणि केवळ 5 मिनिटांत प्रक्रिया पूर्ण होईल.

पोस्टमनच्या माध्यमातून घरबसल्या अपडेट करा

तुम्हाला आधार केंद्रावर जाणे शक्य नसेल, तर ‘इंडिया पोस्ट पेमेंट्स बँक’ (IPPB) ने ज्येष्ठ नागरिक आणि सर्वसामान्यांसाठी एक उत्तम सुविधा सुरू केली आहे.

असेही मोबाईल नंबर अपडेट करू शकता

• गुगलवर जाऊन ‘IPPB Doorstep Banking’ सर्च करा किंवा त्यांच्या अधिकृत पोर्टलला भेट द्या.
• तिथे ‘Service Request Form – Institutional/General’ मध्ये ‘CELC – Aadhaar Mobile Update’ हा पर्याय निवडा.
• तुमचे नाव, पत्ता, पिनकोड आणि नवीन मोबाईल नंबर भरून फॉर्म सबमिट करा.
• फॉर्म भरल्यानंतर, तुमच्या भागातील पोस्टमन बायोमेट्रिक मशीन घेऊन थेट तुमच्या घरी येईल.
• घरबसल्या तुमचे फिंगरप्रिंट घेऊन नवीन मोबाईल नंबर लिंक केला जाईल. यासाठी पोस्टमनला 50 रुपये अधिकृत शुल्क द्यावे लागेल.

नंबर अपडेट होण्यासाठी किती वेळ लागतो?

आधार केंद्रावर किंवा पोस्टमनद्वारे बायोमेट्रिक दिल्यानंतर सिस्टीममध्ये तुमचा नवीन नंबर अपडेट होण्यासाठी साधारणपणे 24 ते 72 तास (1 ते 3 दिवस) लागतात. काही प्रकरणांमध्ये याला जास्तीत जास्त 7 दिवस लागू शकतात. नंबर अपडेट झाल्यावर तुमच्या नवीन मोबाईलवर UIDAI कडून यशस्वी झाल्याचा मेसेज येतो.