पुणे : शिक्षणाची पंढरी म्हणून ओळख असलेल्या पुण्य नगरीत (Pune) गुन्हेगारीच्या घटनांमध्ये वाढ होत असून नव्या पिढीकडे, झेन झी तरुणाईकडे विशेष लक्ष देण्याची गरज व्यक्त होत आहे. अनेकदा तरुणाईकडून किरकोळ कारणावरुन आपलं जीवन संपवल्याच्या धक्कादायक घटनाही घडत आहेत. आपल्या कुटुंबीयांचा विचार न करता, आई-वडिलांची काळजी न करत हे टोकाचे पाऊल उचलले जाते. आता, पुण्यात 18 वर्षीय तरुणीने राहत्या घरात गळफास घेऊन जीवन संपवल्याची घटना समोर उघडकीस आली आहे. नीट (NEET) परीक्षेतील कमी गुणामुळे तिने हा निर्णय घेतल्याचा प्राथमिक अंदाज आहे.
पुण्यातील काळेपडळ भागातील परिसरात आज सकाळी ही दुर्दैवी घटना उघडकीस आली, अनुष्का चौगुले (18 वर्षे) असं आत्महत्या केलेल्या तरुणीचे नाव आहे. अनुष्काच्या आत्महत्येचे कारण अद्याप अस्पष्ट आहे. मात्र नीट परीक्षेत कमी गुण मिळाल्यामुळे टोकाचे पाऊल उचलल्याचा तपास यंत्रणांना संशय आहे. कारण, नीट परिक्षेचा निकाल लागल्यानंतर काही तासांतच तिने हा टोकाचा निर्णय घेतल्याने कुटुंबीयांवर शोककळा पसरली आहे. वैद्यकीय प्रवेश परीक्षा म्हणजेच नीटच्या पुनर्परिक्षेचा निकाल 16 जून रोजी देशभरात जाहीर झाला. त्यानंतर, अनेकांनी आपले गुण शेअर करत आनंद साजरा केला. मात्र, काहींना गुण कमी मिळाल्याने दु:ख झाल्यचंही पाहायला मिळालं. अनुष्कानेही नीट परीक्षा दिली होती, अशी माहिती आहे.
तरुणी काल रात्री नेहमीप्रमाणे आपल्या बेडरूममध्ये झोपण्यासाठी गेली होती. मात्र, आज सकाळी बराच वेळ झाला तरी ती रुममधून बाहेर न आल्याने तिच्या आई-वडिलांनी तिला आवाज दिला. तरीही घरातून कोणताही प्रतिसाद न मिळाल्याने त्यांनी बेडरूमचा दरवाजा उघडण्याचा प्रयत्न केला, परंतु दरवाजा आतून बंद होता. त्यानंतर कुटुंबीयांनी दरवाजा तोडून आत प्रवेश केला असता, तरुणीने गळफास घेऊन आत्महत्या केल्याचे निदर्शनास आले. या घटनेची माहिती पोलिसांना देण्यात आली असून, पोलिसांनी घटनास्थळी धाव घेत पुढील तपास सुरू केला आहे.
हेही वाचा
