चंद्रपूर : राज्यातील अन्न व औषध प्रशासन विभागाच्या आयुक्तपदी तुकाराम मुंढे (Tukaram mundhe) यांची नियुक्ती झाल्यानंतर राज्यभरात भेसळ, आणि गुटखा, तंबाखूजन्य पदार्थांच्या कारवाईला वेग आला असून कोट्यवधि रुपयांचा मुद्देमाल जप्त करण्यात आला आहे. विशेष म्हणजे, या कारवाईच्या भीतीने राज्यातील अनेक जिल्ह्यात पान पट्टीवरुन गुटखा गायब झाल्याचं दिसून आलं. तर, काही दिवसांपूर्वी एफडीएच्या अधिकाऱ्यांच्या धकसा घेत पानटपऱ्याही बंद करण्यात आल्याचं दिसून आलं होतं. मात्र, चंद्रपूरमध्ये (chandrapur) चक्क पान सेंटरच्या दुकानातून 104 ग्रॅम एमडी ड्रग्स (MD) पदार्थ जप्त करण्यात आला आहे. या एमडी साठ्याची बाजार भावातील किंमत 5 लाख रुपये असल्याची माहिती आहे.
चंद्रपूर शहरातील जटपुरा गेट परिसरातील प्रसिद्ध इटनकर पान सेंटरवर पोलिसांनी घातलेल्या धाडीत 5 लाख रुपये किमतीचा 104 ग्रॅम MD साठा जप्त करण्यात आला आहे. चंद्रपूर पोलिसांच्या स्थानिक गुन्हे शाखेला मिळालेल्या गोपनीय माहितीच्या आधारे जटपुरा गेट जवळच्या इटनकर पान सेंटर वर सापळा रचून पोलिसांनी आरोपी ओम संतोष इटनकर (25) याला ताब्यात घेतले. आरोपीची तसेच त्याच्या राहत्या घराची झडती घेतली असता त्याच्या ताब्यातून 104 ग्रॅम एम.डी. म्हणजेच MEPHEDRONE ड्रग्ज जप्त करण्यात आले. चंद्रपूर शहरात पान शौकिनांचे आवडीचे ठिकाण म्हणून प्रसिद्ध असलेल्या इटनकर पान सेंटर मध्ये मोठ्या प्रमाणात ड्रग जप्त करण्यात आल्याने एकच खळबळ उडाली आहे. याप्रकरणी दोन आरोपींविरुद्ध पोलीस स्टेशन रामनगर येथे गुन्हा नोंद करण्यात आल्याची माहिती स्थानिक गुन्हे शाखा पोलिस निरीक्षक अमोल काचोरे यांनी दिली.
गडचिरोलीत एफडीएच्या पथकाची कारवाई
गडचिरोलीत अन्न व औषध प्रशासन विभागाच्या पथकाने शहरातील लक्ष्मी आईस फ्रुट फॅक्टरीवर टाकलेल्या धाडीत आईसक्रीममध्ये वापरले जाणारे निकृष्ट दर्जाचे 9.3 किल्लो फ्रोजन डेझर्ट जप्त केले आहे. धानोरा मार्गावर असलेल्या लक्ष्मी आईस फ्रुट फॅक्टरीत तयार होणारे हे फ्रोजन डेझर्ट वापरून तयार केलेल्या आईसक्रिम कोनवर उत्पादन दिनांक किंवा वापरण्याची अंतिम मुदत, उत्पादनाबाबतचा तपशिल असे काहीही नमूद केलेले नव्हते. विशेष म्हणजे हे फ्रोजन डेझर्ट लवकर खराब होणाऱ्या स्वरूपाचा असल्याचे पथकाला आढळून आले. अतिशय अस्वच्छ वातावरणात या पदार्थाची साठवणूक आणि एफडीएच्या नियमांची पूर्तता न करता हा कारखाना चालविल्या जात होता. यावेळी 9.3 किलो फ्रोजन डेझर्ट जप्त करत एफडीएच्या नियमांना डावलणाऱ्या लक्ष्मी आईस फ्रुट फॅक्टरीचा परवाना अन्न प्रशासन विभागाचे सहायक आयुक्त जी.टी.सातकर यांनी आता निलंबित केला आहे.
हेही वाचा
Ketan Agarwal Case Pune :मुलीच्या कृत्याने सियाचे आई-वडील हादरले, म्हणाले; दोषी असेल तर माझ्या मुलीलाही लोहगडावरुन ढकलून द्या!
