केतन अग्रवाल हत्याकांडाने महाराष्ट्रासहित देश हादरला आहे. या हत्याकांडाची संपूर्ण देशभर चर्चा होत आहे. पोलिसांकडूनही याप्रकरणी आरोपींची कसून चौकशी सुरू आहे. देशाचं लक्ष लागलेल्या केतन अग्रवाल हत्याकांड प्रकरणाचा तपास वेगाने सुरू आहे. पुण्याच्या लोणावळा ग्रामीण पोलिसांनी या हत्याकांडाशी संबंधित अनेक वस्तू जप्त केल्या आहेत. पोलिसांनी चेतन चौधरीची बाइक देखील जप्त केली आहे. याच बाइकने चेतन चौधरी लोहगड किल्ल्यावर पोहोचला होता, पोलिसांनी आरोपींकडून हुडी, हेडफोन जप्त करून फॉरेन्सिक तपासणीसाठी पाठवले आहेत.
पुण्यातील २६ वर्षीय रिअल एस्टेट व्यावसायिक केतन अग्रवाल हत्याकांड प्रकरणात लोणावळा ग्रामीण पोलिसांनी घटनास्थळावरून पुरावे गोळा करण्यास सुरुवात केली आहे. सियाचा बॉयफ्रेंड चेतन चौधरी 18 जून रोजी लोहगडावर ज्या बाइकने आला होता. ती बाइक देखील पोलिसांनी जप्त केली आहे. बाइकसोबत त्याच्याजवळील हुडी आणि हेडफोन जप्त करण्यात आले आहेत. पोलिसांच्या माहितीनुसार, बाइक आणि कपड्यांची फॉरेन्सिक तपासणी केली जाईल. या तपासणीमुळे या प्रकरणातील आणखी भक्कम पुरावे मिळण्याची शक्यता पोलिसांनी व्यक्त केली आहे.
त्या दिवशी नेमकं काय घडलं?
पोलिसांच्या माहितीनुसार, पुण्यात राहणारा केतन अग्रवाल हा होणारी बायको सिया गोयलसोबत लोहगड किल्ल्यावर आला होता. याच किल्ल्यावर आरोपींनी कट रचून केतनची हत्या केल्याचा आरोप आहे. सियाने हळूच खाली बसलेल्या चेतनला इशारा दिला. त्यानंतर पाठीमागून आलेल्या चेतनने किल्ल्याच्या कडेला बसलेल्या केतनला धक्का दिल्याचा आरोप आहे. या घटनेत केतनचा जागीच मृत्यू झाला.
सुरुवातीला केतनचा अपघाती मृत्यू झाल्याचा दावा करण्यात येत होता. परंतु पोलिसांच्या चौकशीच दोघांनी कट रचून केतनची हत्या केल्याचं उघड झालं. पोलिसांनी कसून चौकशी केल्यानंतर आरोपींनी सर्व घटनाक्रम सांगितला. पोलिसांनी आता फॉरेन्सिक अहवाल, इलेक्ट्रॉनिक पुरावे, घटनास्थळी मिळालेल्या पुराव्यांवर लक्ष केंद्रीत केलं आहे. आता पोलीस फॉरेन्सिक अहवालाच्या प्रतिक्षेत आहेत. या फॉरेन्सिक अहवालातून धक्कादायक माहिती उघड होण्याची शक्यता आहे.
