ठाणे : नीट पेपरफुटीनंतर महाराष्ट्रात खळबळ उडवून देणाऱ्या टीईटी पेपर (TET Paper Leak) फुटीचंही आता दिल्ली अन् हरयाणा कनेक्शन समोर आलं आहे. उद्या 28 जून रोजी होणाऱ्या टीईटी परीक्षेचा पेपर फुटल्याने ही परीक्षा रद्द करण्यात आली असून पोलिसांनी तीन आरोपींना अटक केली आहे. विमानतळ परिसरातून भिवंडी (Bhiwandi) पोलिसांनी आरोपीला बेड्या ठोकल्या. त्यानंतर, अपर पोलीस आयुक्त अशोक दुधे यांनी पत्रकार परिषद घेऊन टीईटी पेपर फुटीसंदर्भात माहिती दिली. भिवंडी पोलिसांनी तीन आरोपींना (Police) अटक केली असून यातील 2 आरोपी बिहारमधील आहेत, तर एक आरोपी हरियाणामधला आहे. दीड कोटी रुपयांत या पेपरचा व्यवहार ठरला होता, मात्र पोलिसांच्या सतर्कतेमुळे ही पेपरफुटी समोर आली.
टीईटी पेपर विक्रीसाठी आरोपि दिल्लीतून आले होते. त्यामध्ये, राजीव शाह (बिहार), आकाश कुमार (बिहार) आणि धीरज कुमार (हरियाणा) अशी आरोपींची नावे असून त्यांचे वय अनुक्रमे 45, दुसरा 30 आणि तिसऱ्याचं 28 वर्षे आहे. मात्र, याप्रकरणातील मुख्य आरोपी अद्यापही फरार आहे. आरोपींकडून या पेपर विक्रीसाठी दीड कोटी रुपयांची मागणी करण्यात आली होती. पोलिसांच्या झडतीत 4 सेट पेपर मिळाले असून मोबाईल डेबिट कार्ड देखील मिळाले आहेत. पोलिसांनी, भारतीय न्याय संहिता कलम ३१८(४) ३१६(५) ६१(२), सह महाराष्ट्र परीक्षाअधिनियम २०२४ या प्रमाणे गुन्हा दाखल केला आहे.
परीक्षा विभागाकडून पडताळणी
पोलिसांना मिळालेल्या गोपनीय माहितीच्या आधारे आरोपींसाठी ट्रॅप लावण्यात आला होता. आरोपी दिल्लीवरुन पेपर विकण्यासाठी भिंवडीला आले होते, कोणासाठी पेपर विकायला आले होते, कोणाला विकला, कुणी घेतला? या सर्व बाबींचा तपास करण्यात येत आहे. विशेष म्हणजे, आरोपींकडून जे पेपर विकत घेणार होते, ते विविध रकमा घेऊन पुढे विकणार होते, अशी माहिती समोर आल्याचेही पोलीस आयुक्त अशोक दुधे यांनी दिली. पोलिसांना आढळून आलेले पेपर शिक्षण विभागाला पाठवले, त्यांनी पेपर पडताळले असता हे पेपर त्याच परीक्षेचे आहेत, असे निष्पन्न झाल्याची माहितीही दुधे यांनी दिली.
कोचिंग सेंटरचीही चौकशी होणार
दरम्यान, याप्रकरणी स्पेशल SIT नेमण्यात आली असून डीसीपी पवन बनसोडे यांच्यामार्फत ही टीम नेमली आहे. आरोपींना पेपर कुठून मिळाला हे तपासातून कळेल, सर्व शक्यता गृहीत धरली आहे. याप्रकरणातही कोचिंग सेंटर आणि सर्वांची चौकशी करणार असून पेपर घेऊन दिल्लीहून आरोपी इथं पोहोचले आहेत. प्राथमिक तपासात शिक्षण विभागाचा सहभाग आढळला नाही, यातील एका आरोपी केंद्रीय विद्यालयात नोकरी लावण्यासाठी पैसे दिले होते, तर एका आरोपीने TET ची परीक्षा दिली असून तो त्यात नापास झाला होता.
रविवारची परीक्षा रद्द, पुढे ढकलली
28 जून, 2026 रोजी आयोजित करण्यात आलेली शिक्षक पात्रता परीक्षा (TET) पुढे ढकलण्यात येत आहे. कोणत्याही परिस्थितीत परीक्षा पूर्ण पारदर्शकपणेच व्हावी हा परीक्षा परिषदेचा आग्रह असल्याने व याबाबत सखोल चौकशी होणे गरजेचे वाटत असल्याने ही परीक्षा पुढे ढकलण्यात येत आहे. शिक्षक पात्रता (TET) परिक्षेबाबत अद्यावत माहिती महाराष्ट्र राज्य परीक्षा परिषदेच्या वेबसाईटवर प्रसिद्ध करण्यात येईल, अशी माहिती महाराष्ट्र राज्य परिक्षा परिषदेकडून स्पष्ट करण्यात आलं आहे.
परीक्षा शुल्क पुन्हा द्यावे लागणार नाही
महाराष्ट्रातील 6 लाख 128 शिक्षकांसाठी घेण्यात येणारी टीईटी परीक्षा रद्द करण्यात आली असून ह्या परीक्षेसाठी पुन्हा नोंदणी करण्याची गरज नाही. त्यामुळे, परीक्षेसाठी राज्यातील 6 लाख 128 परिक्षार्थींकडून अतिरिक्त शुल्क आकारले जाणार नाही. येत्या 2 ते 3 दिवसांनी टीईटी परीक्षेची नवीन तारीख घोषीत केली जाईल, 37 शहरातील 1028 परिक्षा केंद्रावर पुन्हा नव्याने परिक्षा घेतली जाणार आहे, अशी माहिती महाराष्ट्र राज्य परीक्षा परिषदेच्या उपायुक्त प्रिया शिंदे यांनी दिली.
हेही वाचा
मोठी बातमी! TET पेपरफुटीप्रकरणात तिघांना अटक, एअरपोर्ट परिसरातून पोलिसांनी उचललं, तपास सुरू
Uddhav Thackeray Full Speech Yavatmal : आईची शपथ घेऊन गद्दारी केली, भरसभेत दाखवला फुटीर खासदाराचा ‘तो’ जुना व्हिडिओ
