खासदार निलेश लंके आणि आमदार रोहित पवार यांनी भाजपचे माजी खासदार सुजय विखे पाटील यांच्यावर टीका केली होती. यानंतर आता सुजय विखे पाटील यांनी पलटवार केला आहे. ते म्हणाले की, निलेश लंके यांचे दुसऱ्यांच्या झेंड्यावर पंढरपूरचे डायलॉग आता जुने झाले आहे. निलेश लंके यांना स्वीडन कुठे आहे हे माहीत आहे का ?, असं म्हणत सुजय विखे पाटलांनी सवाल केला आहे.
सुजय विखे पाटील म्हणाले की, मागील तीन वर्षांत निलेश लंके यांच्यावर वैयक्तिक पातळीवर कधीही बोललो नाही. विकासकामांऐवजी पारिवारिक वादात पडून राजकारण करणे जिल्ह्यासाठी धोकादायक असते. महिलांच्या कॉल रेकॉर्डिंगचा मुद्दाही उपस्थित करता आला असता मात्र सभ्यता म्हणून बोललो नाही. समाजासाठी काही काम केले नाही, त्यामुळे हायलाईट होण्यासाठी मुद्दा शोधला जातोय, असं म्हणत सुजय विखेंनी निलेश लंकेवर जहरी टीका केली आहे.
रोहित पवारांवर बोलताना विखे म्हणाले की, रोहित पवार हे सुसंस्कृत परिवारातील लोकप्रतिनिधी आहेत. त्यांनीही सुसंस्कृतपणा जपावा. आमच्या कौटुंबिक विषयांवर बोलत असाल तर तुमच्या कौटुंबिक कलहावरही चर्चा होऊ शकते. विखे-पवार कुटुंबांनी कौटुंबिक विषय कधीही माध्यमांसमोर आणले नाहीत. आम्ही पक्षांतर केले असेल, तरी जनतेने पाच वेळा महाराष्ट्रातील पहिल्या पाच मताधिक्यांमध्ये निवडून दिले आहे.
स्वीडनच्या खासदार निला विखेंवर बोलताना ते म्हणाले की, कौटुंबिक गोष्टींचे राजकारण थांबले पाहिजे. श्रेयवादाचा विषय नाही. निला विखे स्वकष्टाने स्वीडनमध्ये काम करत आहेत. आम्ही आमच्या पद्धतीने काम करत आहोत. आमच्या कौटुंबिक प्रश्नावर चर्चा का? निला विखे पाटील या स्विडनच्या खासदार झाल्या त्याबद्दल पत्रकारांनी विचारले. एक परिवार म्हणून राहिलोय त्यामुळे भाषणात मी मार्मिक पणे अभिनंदन केले. मला श्रेय घ्यायचं नाही. त्यांनाही नाही. आम्ही तिकडे आणि त्या इकडे प्रचाराला आल्या नाहीत, असं त्यांना सांगितलं.
सुजय विखे पाटील पुढे म्हणाले की, ते स्वकष्टाने तिकडे काम करत आहेत. आम्ही इकडे. श्रेयवादाचा विषय नाही. आमचा संपर्क जरी नसला तरी ज्येष्ठ लोक परिवारातील सदस्य म्हणून अभिनंदन करतात. कौटंबिक गोष्टीचे राजकारण होत आहे ते थांबावं. आम्ही काही फ्लेक्स लावले नाहीत. पत्रकार परिषद घेतली नाही, असं म्हणत त्यांनी आरोपांवर स्पष्टीकरण दिले आहे.
