AUS vs BAN नवी दिल्ली : बांगलादेशनं ऑस्ट्रेलियाला पहिल्या कसोटीत 9 विकेटनं पराभूत करत क्रिकेट विश्वात खळबळ उडवून दिली होती. पहिल्या कसोटी सामन्यातील पराभवानंतर ऑस्ट्रेलियाच्या माजी क्रिकेटपटूंनी जोरदार टीका केली होती. बांगलादेशनं पहिल्या कसोटीमध्ये विजय मिळवत मालिकेत 1-0 अशी आघाडी मिळवली आहे. आता दुसरी कसोटी 22 ऑगस्टपासून सुरु होणार आहे. या कसोटीसाठी ऑस्ट्रेलियानं संघ जाहीर केला आहे. विशेष बाब म्हणजे पहिल्या कसोटी सामन्यातील पराभव ऑस्ट्रेलियाच्या जिव्हारी लागल्याचं दिसून येतंय. कारण, ऑस्ट्रेलियानं दुसऱ्या कसोटीत सलामीवीराला डच्चू दिला आहे. त्याच्या जागी नव्या खेळाडूला संघात संधी दिली आहे.
ऑस्ट्रेलियाकडून सलामीवीर खेळाडूला डच्चू
ऑस्ट्रेलिया आणि बांगलादेश यांच्यातील दुसरी कसोटी 22 ऑगस्टपासून साऊथ मॅकेपमध्ये होणार आहे. या कसोटीसाठी ऑस्ट्रेलियानं 13 जणांच्या संघाची घोषणा केली आहे. पहिल्या कसोटीत अपयशी ठरलेल्या जेक वेदराल्ड याला संघातून वगळण्यात आलं आहे. जेक वेदराल्ड यानं पहिल्या कसोटीतील पहिल्या डावात 23 धावा केल्या होत्या तर दुसऱ्या डावात खातं देखील उघडता आलं नव्हतं. वेदराल्ड याच्या जागेवर मॅट रेनशॉ याला संघात संधी देण्यात आली आहे. तो ट्रॅविस हेडसोबत डावाची सुरुवात करेल. रेनशॉ यानं 14 कसोटीमध्ये 24 डावात 1 शतक आणि तीन अर्धशतकं केली आहेत. रेनशॉच्या नावावर 645 धावा आहेत. रेनशॉची सर्वोच्च धावसंख्या 184 इतकी आहे.
डेविड वॉर्नर 2024 मध्ये निवृत्त झाल्यानंतर रेनशॉ ऑस्ट्रेलियाचा सातवा सलामीवीर असेल. ट्रेविस हेड, स्टीव स्मिथ, नाथन मॅकस्वीनी, सॅम कोन्स्टास, मार्नस लाबुशेन आणि वेदराल्ड या सर्वांना ऑस्ट्रेलियाकडून सलामीवीर म्हणून संधी देण्यात आली. मार्नस लाबुशेन त्याचं स्थान वाचवण्यात यशस्वी ठरला. मात्र, पहिल्या कसोटीतील अपयशानंतर त्याच्यावर देखील दबाव आहे. बांगलादेश विरोधातील पहिल्या कसोटीत लाबुशेन यानं 1 आणि 31 धावा केल्या आहेत.लाबुशेनला दुसऱ्या कसोटीत अंतिम अकरा खेळाडूंमध्ये स्थान मिळाल्यास चांगली कामगिरी करण्याचा दबाव असेल. दुसऱ्या कसोटीत अपयश आल्यास त्याला संघातून वगळलं जाऊ शकतं.
ऑस्ट्रेलियाचा पहिल्या कसोटीत खराब फलंदाजीमुळं पराभव झाला होता. बांगलादेश विरोधातील दुसऱ्या कसोटीत ऑस्ट्रेलियाच्या फलंदाजांना आणि गोलंदाजांना देखील कामगिरी सुधारावी लागेल. ऑस्ट्रेलियानं दुसऱ्या कसोटीत विजय मिळवला नाही तर होम ग्राऊंडवर बांगलादेशकडून मालिकेत पराभव स्वीकारावा लागेल. दुसरीकडे बांगलादेशकडे मालिका विजयाची संधी आहे. दुसरी कसोटी जिंकली अथवा अनिर्णित राहिली तरी ते मालिका जिंकू शकतात.
ऑस्ट्रेलियाचा दुसऱ्या कसोटीसाठी संघ – ट्रेविस हेड, मॅट रेनशॉ, मार्नस लाबुशेन, स्टीव स्मिथ, कॅमरून ग्रीन, एलेक्स कॅरी (विकेटकीपर), ब्यू वेबस्टर, पॅट कमिन्स (कर्णधार), मिशेल स्टार्क, नाथन लियोन, जोश हेजलवूड, जोश इंग्लिस आणि स्कॉट बोलैंड
